يا سلام لو الدنيا لعبة snake

المشكلة الكبيرة للناس انها ممكن تكون بتخسر
ومش قادرة تفهم ايه سبب الخسارة بالتالى
ناس بتفضل متمسكة بالامل فى حاجات منتهية ... !!!
تخيل انك عايش حياتك عادى وعمال تخسر وفجأة تظهر رسالة قدامك تقولك :
" كفاية يا كابتن انت بقالك كتير بتخسر ، و أحسن حاجة غير المستوى اللى بتلعب فيه" ..
بجد تبقى حاجة جامدة , أصل المشكلة الكبيرة للناس انها ممكن تكون بتخسر ومش قادرة
تفهم ايه سبب الخسارة بالتالى بتكمل لعب فى الدنيا وبتخسر برضه يبقى لازم يكون فيه مرشد ليك فى الدنيا يحذرك ..
يعنى مثلا لعبة الثعبان بتاعة الموبايلات الـ نوكيا لما تفضل تخسر كتير.. تتوقف اللعبة عند كلمة " LEVEL " يعنى مستوى ، والمقصود انك لازم تغير المستوى عشان بقالك كتير بتخسر وهو ده اللى المفروض يحصل فى الدنيا.. يعنى مثلا
واحد بيموت على واحدة ومعجب بيها وهى منفضاله وعمال يحاول معاها مرة يقعد على باب المدرج لما يعرف انها هتحضر المحاضرة دى ويفضل مستنى يمكن لما تعدى وتدخل المدرج تبصله والبنت تيجى فعلا وتدخل المدرج ولا كأنها شافته والواد يفضل يحاول ويجرى وراها يدور على نمرة تليفونها أو رقم بيتها لغاية ما يعرفه و يروح البيت يستناها تحته يمكن تبص من البلكونة ، فتشوفه قاعد تحت البيت وبرضه مش بتعبره، وبين يوم والتانى البنت تمشى مع واد تانى وهو برضه متعلق بأمل انها هترجعله هنا بقى لازم حد يوقفه عند حده ويقول بصوت عالى " فوق ياكابتن انت عمال تخسر بقالك كتير يا اما تغير المستوى اللى بتلعب عليه أو تغير اللعبة خالص يا اما تروح تقول للبنت بكل شجاعة انك بتحبها أو تنفض لها وتحب واحدة غيرها يا اما انك تفضل تخسر كده على طول فهى دى أكبر غلطة ممكن تغلطها .
مش بس الحياة العاطفية للانسان هى اللى بتتحمل الغلط والخسارة فيه ناس بتفضل متمسكة بالامل فى حاجات منتهية لازم يغيروا كل حاجة حواليهم عشان يرجعوا للدنيا ,

* مثلا واحد بيشتغل شغلانة وأثبت بما لايدع مجالا للشك انه فاشل وجرب مرة واثنين وتلاتة وفشل طب ليه ما يغيرش اللعبة أو يغير المستوى اللى بيلعب فيه؟
أقولك ليه لانه مش عاوز يبان قدام نفسه انه بيخسر مع انه باين قدام الناس كلها بيخسر وهو من جواه عارف انه بيخسر يبقى الحل الوحيد فى الظروف دى ان اللعبة تقوله كفاية "Game over " يا كابتن غير المستوى اللى بتلعب فيه أو غير اللعبة وأكيد الدنيا هتظبط معاك وهتعمل " top score" فى اللعبة

عناوين الاخبار

كتير بتشدنا عناوين اخبار معينة بتكون موجودة على النت .... ولما تدخل علشان تقرا التفاصيل بتاعة الخبر .... تلاقية فاضى من جوة
او بمعنى تانى التفاصيل الى جوة الجبر ملهاش اى علاقة بعنوان الخبر .. مثلا تلاقى عنوان بيقول (ليونيل ميسى رسميا فى النادى الاهلى ) الله ميسى فى الاهلى .. تدخل تقرا بقى الخبر علشان تشوف مدى براعة عدلى القيعى فى التعاقد مع اللاعبين .. تلاقى تفاصيل الخبر عبارة عن شرح ازاى تعمل edit player وتجيب ميسى فى الاهلى فى البلاىستيشن ......
تلاقى خبر تانى زى الفل كدة بيقول ( عااااااااجل :- احمد السقا يعانى من السرطان ويدخل المستشفى ) اوباااااا يانهار اسود السقا عندة سرطان
تدخل تقرا تفاصيل الخبر تلاقى التفاصيل بتقول .. يقوم الفنان الكبير احمد السقا بتصوير دورة فى الفيلم الجديد ........... والذى يجسد فية شخصية مريض بالسرطان و .....و.... وما الى ذلك
الغريب بقى الناس الى بتقرا الاخبار دى
يعنى فى ناس بتاخد الخبر من العنوان من غير ما تقرا تفاصيل الخبر نفسة
ييجى يقولك دة حصل كذا كذا اة والله انا قريتها على النت ...
تسألة طيب اية التفاصيل او حصل ازاى ... تلاقية بيقولك معرفش انا قريت العنوان بس
ومعرفش اية وجة الاستفادة الى بتعود على الى كاتب الاخبار دى بعناوينها كدة
يا ريت نركز شوية ومناخدش الاخبار من عناوينها ونقرا كويس ونفهم مضمون الخبر بيقول اية
ونفهم الماس دى بتتكلم ازاى ومناخدش الاخبار من اى مصدر

موقف البنات من الجواز

اكتشفت على الرغم من قلة خبرتي في الحياة وصغر المدة التي قضيتها فيها مش عارف هاخرج امتى .. أهي مدة والواحد بيخلصها .. ان البنات واخدة موقف واحد .. لا مش موقف سياسي ولا اجتماعي ولا حتى أحمد حلمي ده موقف من الجواز قال ايه البنات مش عايزين يتجوزوا وكلهم مش بيفكروا في الحكاية دي خالص ، الحكاية كانت في المدرسة بنات المدرسة كلهم على اختلاف أشكالهم والوانهم متفقين على نفس الكلام : أنا مش عاوزة أتجوز ومش بافكر خالص في الحكاية دي .. لما أدخل الجامعة واشتغل أبقى أفكر .
وبص بقى لو واحدة ارتبطت بواحد وهما في أولى ثانوي هتكلمه عن أسماء عيالهم ولون حيطان البيت والسجاجيد وهتنسى الموقف بتاع زمان خالص وكأنها ما قالتش حاجة .
في الكلية الفكرة مختلفة كل بنت بتدخل الجامعة وبتقول انها جاية تدرس وتتخرج وبعدين تبقى تفكر في حكاية التعرف على رجالة أو الجواز .
هما أسبوعين لا غير وبمجرد أن تتعرف على شلة ولاد هتنسى كلامها ولو ارتبطت بواحد منهم هتسمع كلام تاني خالص عن ازاي هو هيساعدها وهيشجعها على العمل والدراسة ده حتى يا أخي المرأة نصف المجتمع ووراء كل ست عظيمة رجل أعظم بيعرف يطبخ ويغسل وبيحب قعدة البيت وأدي الموقف بتاعها كمان راح في الكازوزة ، نيجي بقى للبنات اللي اتخرجت دول بقى حكايتهم حكاية وهي لأن البنات بتبدأ تحس بالخطر وإن كلامها بتاع زمان مش هيجيب نتيجة وإن الخطر قادمُ قادم ..
وده مش عشان لا سمح الله هما وحشين بس علشان الظروف الاقتصادية وارتفاع قيمة الدولار وايضا ارتفاع نسبة البطالة واضمحلال المعايير والاخلاقيات وإن ما حدش عنده دم عشان يبص لهم ويبدأ كلامهم يتغير وتبدأ البنات تحاول تخفي فكرة إنها هتعنس بانشغالها بالشغل وبتقول كده للناس ودي بتكون بداية الصدام والخناقات بين المجتمع والبنات فالمجتمع بيقول عليهم عوانس وبيبدأ يرفضهم والبنات بتتقوقع على نفسها وترفض المجتمع والمشكلة في الآخر بتتكلكع وتتعك أكثر من كلكعة موقف أحمد حلمي الساعة 2 الضهر

عفوا يا شباب فهى ليست مزة

هى لها حقوق مثلنا بالضبط ايها الشاب...طالما انها تراعى الاداب والعادات والتقاليد فليس من
حقك ان تعاكسها
نعم...هذه بدايه قبل ان يقول احد ان البنت بلبسها تجبر الولد على ذلك...انا سأتكلم عن فئه
لاترتدى الكت ولا شورت ولا بنتاكور..(وحتى لو كانت كذلك فذلك ليس مبررا)
من حقها عندما تخرج هى وصديقاتها وتحترم كل من حولها من حقها ان تحترمها وتدعها
لخصوصياتها..لماذا تلاحقها عيناك ولماذا تسمعها كلمات غزل؟؟؟؟ هى لم تطلب منك ذلك...ولم
تفعل مايشجعك على ذلك...هى تحترم نفسها اذا يجب ان تحترمها..

سيقول الشباب البنات بتحب كده واحنا بنرفع روحهم المعنويه
وانت يعنى بتشيل على اكتافك الواجب الوطنى ده وهترفع روحهم المعنويه!!!!!!!

هى حلوه وعارفه انها حلوه..محدش طلب رأيك؟؟؟؟ مجتش جنب سياتك وقالتلك ها انا حلوه!!! ليه تفرض نفسك على اذنها؟؟؟وليه
تسمعها هذه الكلمات البذيئه نعم...انا اعتبر كلمه (مزه) كلمه بذيئه كلمه تحط من قدرها وتختصر انسانه بثقافتها وعقلها واخلاقها
وتعليمها ودينها فى مجرد(مزه)
عفوا اهى انســـــــانه مــــــــــش مـــــــــزه

نعم فلتعلم ايها الشاب قبل ان تفكر ان تعاكس (ولن اتكلم من الناحيه الدينيه لانها معروفه للجميع)
إعلم انك بهذا لا تنول اعجاب الفتاه وانها تعتبرك طفل صغير او مراهق لايستطيع التعامل او التحاور مع الفتاه فكل مايراه انها (مزه ) لا
يستطيع ان يقيم معها حوار وقد تكون تلك(المزه) تفوقه ثقافة وعلما
وللامانه طلعت اليومين دول كلمه سخيفه ايضا بين البنات ..لما تحب توصف ولد تقول(مز) ياااااااحلاااااااوه!!!!!! وانتى اصلا يوم ماتحب واحد تقولى
عليه( مز )عادى كده وفرحانه ودا كده راجل فى عينك والولد بأه بيكون سعيد ومنشكح لما يعرف انه اتقال عليه (مز)..!!!!